Дир росу

Г1адамал ч1ух1и гьеч1ел

Ч1амуч1аб хабар гьеч1ел,

Бечедавин гучавин

Чидай бет1ер къулич1ел,

Хьиндалаца т1илълъалин,

Х1ебдалаз ц1улал коран,

Реха-реч1ч1улеб раг1и

Камун теч1еб дир росу.

Хундерил т1алъиялда

Т1оцебе г1азу щолеб,

Т1огьол мах1 бахъинч1ого

Ч1вараб ц1ер биунареб.

Даран-базар лъаларел

Боц1уда хъант1и гьеч1ел

Бугелде г1ейги гьабун

Г1одор ричан х1алт1улел.

Муг1рул гьава-бакъалда

Рекъеч1ого гуро ниж,

Щибаб рокъоса г1адин

Къват1ир гочине ккарал.

Росулъги х1ебт1ич1ого

Х1алт1иги щоларого

Мугь бищизе х1анч1ч1ильун

Рахъ-рахъалде щущарал.

Гьанже ниж Анжиялда

Аллагьасукьа х1икъун

Ирга гьабун хьвадула

Зикру-свалат бачине.

Нигат бац1ц1адаб буго

Боц1и-мал х1ажат гьеч1о,

Къвариг1ел гьеч1елъубе

Бергин-к1ал биччаларо.

Гьениб зикру бачине

Чакар цее т1амула,

Т1ад рекъезе гьабизе

Гьазулги махщел буго.

Нужер рукъоб баракат

Кидаго камугеги,

Вассал,ясал г1ун рихьун

Берталъе ниж ах1айги.

Унти балагь къварильи

Къавулъе рещт1унгеги,

Къват1ир сапараль арал

Рукъалде льик1 руссайги

Г1адамазда гьоркъоса

Илбис т1аг1ун хут1айги,

Т1ад лъураб какидехун

Кутакаб рокьи ккайги.

Бокьун кьураб гурони

Рикъзи т1аса унгеги

Т1аде Аллагь кьолеб

Х1алалалдасан кьейги

Рукъалда баркат лъейги

Къавулъ рохел решт1айги,

Нагагь балагь щваниги

Щукро гьабизе к1вайги.

Нилъейго рокьукъеб жо

Чидае лъугьунгеги

Чидакьа нечараб жо

Нилъехъаго ккогеги.

Бахъараб х1ет1е рик1к1ун

Рах1маталги рещт1айги,

Угьараб х1ухьел рик1к1ун

Мунагьалги чурайги.

Нилъер данде руссинги

Сабураб жамаг1атги,

Гьоркьоса чи инч1ого

Т1адеги г1емерлъайги.

Кьураб гьаб садакъаги

Къулч1араб лъел къат1раги,

Киназулго чорхое

Дару-сабаблъун ккайги.

ХАЙРАТ ХИРИЯСУЛАЕВА  СИВУХЪ РОСУ.